Вясковая скульптарка
Самадзейнай скульптарцы Марыі Фянько з вёскі Мярэцкія, што на Глыбоччыне, не патрэбны бронза, мрамар ці граніт. Свае творы яны лепіць з цэменту, а размалёўвае іх звычайнай фарбай. На падворку пенсіянеркі жывуць многія казачныя персанажы: і кракадзіл Гена з Чабурашкам, і Чырвоны Капялюшык з шэрым воўкам, і дамавічкі, і анёлы-ахоўнікі, і сава... А вось буслы на яе сядзібе гняздзяцца сапраўдныя.
Хата Марыі Фянько стаіць побач з шашой, таму яе скульптуры бачна з дарогі. Людзі захапляюцца. Працы Марыі Антоўнаўны - буслы і сава - знаходзяцца і ў вядомай на ўсю Беларусь вёсцы Мосар. Іх яна зрабіла па просьбе ксяндза Юозаса Булькі, які вядомы яшчэ і ў якасці ландшафтнага дызайнера.
Вясковая мастачка не толькі лепіць скульптуры, але і малюе. Яе карціны ўпрыгожваюць хату, яны выстаўляліся на розных аглядах у Мінску і Глыбокім, дзе былі адзначаны дыпломамі. У самадзейнай скульптаркі шмат фантазій - зараз яна марыць зляпіць арла і паўліна.
ПАводле газеты "Народнае слова".
Паводле газеты "Народнае слова"
