Гурт “НЕЙРО ДЮБЕЛЬ”, сваёй творчасцю ўжо не раз давеўшы праўдзівасць тытулаў Рок-каралёў і Генералаў айчыннага року, выступіў у Віцебску пасьля трохгадовага перапынку. У канцэрце таксама ўдзельнічалі гурты “ЗАТОЧКА” і “N.E.V.M.A.” з Магілёва.
Вельмі сяброўская цёплая атмасфера панавала на мерапрыемстве: лідэр гурта “Нейро Дюбель” Аляксандр Куллінковіч, як заўсёды, з першых секунд “завеў” залу – такой энэргетыцы і таленту працаваць з публікай можа пазайздросціць кожная зорка. Хэдлайнер напоўніў шчасьцем сэрцы меламанаў, якія хорам выконвалі “Зорачкі” і “Резиновый дом”. Дэбют магілёўскіх гуртоў у Віцебску выйшаў пасьпяпяховым – некалькі песень выконвалася “на біс”.
Канцэрт “Дзюбелей”, як называюць гурт аматары, быў з’арганізаваны Віцебскім прома-цэнтрам “No Logo promo”, які падтрымлівае развіццё альтэрнатыўнай музыкі і спрыяе кшталтаванню музычных густаў публікі Віцебска і ваколіц. У бліжэйшых планах “No Logo promo” канцэрты ЗМІЦЕРА ВАЙЦЮШКЕВІЧА i WZ-Orkestra, які адбудзецца ў Віцебскай абласной філармоніі 17 лютага, і супольны выступ гуртоў “ФЛЯУС і КЛЯЙНН” (Наваполацк), “ZEITNOT” (Менск) і “ANIMAL ДЖАZ” (Санкт-Пецярбург) у КЗ “Віцебск” 23 лютага.
