У Віцебску распачалася кампанія цкавання Барыса Хамайды

25 сакавіка, пакуль вядомы віцебскі апазіцыянер Барыс Хамайда быў затрыманы міліцыяй, невядомыя прымацавалі да яго балкона, які знаходзіцца на другім паверсе, чырвона-зялёны сцяг з цыдулкай, якая раздрукаваная на прынтары.
Чырвона-зялёны сцяг на балконе Барыса Хамайды. Віцебск. Фота Сержука Серабро

Сцяг быў ўсталяваны сярод і белага дня і грунтоўна замацаваны: дрэўка ўстаўлена ў адмысловыя металічныя скобы, якія прыкручаныя да шалёўкі балкона шрубамі, і дадаткова прыбітае цвікамі.

Чырвона-зялёны сцяг на балконе Барыса Хамайды. Віцебск. Фота Сержука Серабро

Цыдулка, прышпіленая да сцяга медным дротам, мае наступны змест: “У гонар дзяржаўнага беларускага сцяга. Слава сапраўдным патрыётам Айчыны. Жыве Канстытуцыя 1996 года, жыве вечна!!!”. Подпіс пад цыдулкай: “Беларус”.

Цыдулка прычэпленая да чырвона-зялёнага сцяга на балконе Барыса Хамайды. Віцебск. Фота Сержука Серабро

Да гэтага спадару Хамайдзе два дні запар забівалі запалкамі і невядомай субстанцыяй замкі ў дзвярах кватэры. У выніку адзін з замкоў непапраўна сапсаваны.

Нагадаем таксама, што ў дзень свайго шасцідзесяцігоддзя вядомы віцебскі апазіцыянер атрымаў ліст з пагрозамі ад імя РНЕ. А некалькі тыдняў таму дзяржаўная газета “Віцебскі рабочы” апублікавала за аўтарствам галоўнай рэдактаркі артыкул са здымкамі, на якіх Барыс Хамайда пераапрануўся.

Старонка газеты “Віцебскі рабочы” са здымкамі

На нашым сайце другі раз невядомыя пакідаюць каментары, у якіх называюць спадару Хамайду камандзірам так званай групы Мірона, але як вядома Барыс Ханонавіч толькі перадаваў журналістам звесткі пра сцягі паведамленыя яму крыніцамі вартымі даверу. Падобна, што пасля таго як у Віцебску цягам бел-чырвона-белага марафону было вывешана больш двух дзесяткаў нацыянальных сцягоў, а Мірон застаўся няўлоўным, у некага пачалася істэрыка, а, магчыма, паляцелі і зорачкі з пагонаў.

Чытайце яшчэ