“Ляпис Трубецкой” прывёз у Віцебск “Весёлые картинки” (Фота)
“Ляпис Трубецкой” 13 лютага ў Віцебску ў памяшканні самага вялікага ў Беларусі клуба “Энэргія” грандыёзным канцэртам прэзентаваў свой новы альбом “Весёлые картинки” некалькім тысячам слухачоў.
Гэта быў чацвёрты і пакуль самы вялікі канцэрт прома-тура — больш за дзве тысячы чалавек прыйшлі паслухаць новыя, ды і старыя таксама, песні гурта. Былі пабіты мінулыя рэкорды вялікіх канцэртаў у “Энэргіі”: 13 сакавіка 2010 году самі “Ляпісы” сабралі тут каля паўтары тысячы слухачоў, а ў траўні таго ж году прыкладна столькі ж — украінскі “Океан Эльзи”.
На “разагрэў” публікі выйшла берасцейская каманда “Дай дорогу”, якая была прынятая віцяблянамі і гасцямі нашага слыннага гораду з вялікім энтузіазмам, хаця паабяцала сыграць “караценька, хвілін на сорак”. Праўда пад канец, калі ўся зала скандавала словы “Дай дорогу” было не зусім зразумела — ці гэта просяць заставацца спадабаўшыся гурт, ці тонка намякаюць такі ўжо прапусціць на сцэну хэдлайнера.
З першых жа акордаў “К нам приехал Трубецкой” усе дзве тысячы глотак сталі падпяваць, адначасова чатыры тысячы ног стараліся прасунуць тушкі фанатаў як мага бліжэй да сцэны з кумірамі. На дапамогу ахове клуба, якая з цяжкасцю ўтрымлівала агароджу перад сцэнай, высунліся байцы палка міліцыі спецыяльнага прызначэння, а крыху пазней, кінўшы форменныя вушанкі на калонкі, да іх далучыліся два міліцэйскія падпалкоўнікі.
У цэлым ў зале панавала сяброўская атмасфера, а энэргія была выключна станоўчая. Звычна песні перапыняліся прыступамі шызафазіі Міхалка, у якіх нехта нават спрабаваў знайсці сэнс. Калі, пасля песні “Харэ”, праваў ачэп і выскачыў на сцэну самы ўдачлівы слухач, каб узяць у бубнача на памяць палачкі, ахова паспрабавала вытурыць яго з клуба. Аднак на абарону свайго фана, следам за бубначом, кінуўся ўвесь гурт.
Каб выбрацца з памяшкання клуба адразу пасля канцэрта магло спатрэбіцца больш за гадзіну, таму што гардэроб не спраўляўся з такой колькасцю людзей. Праўда “Энэргія” запрашала ўсіх, каму споўнілася 18 гадоў, заставацца ў клубе на ўсю ноч.
У рамках прома-тура акрамя Віцебска запланаваны канцэрты ў Маскве, Санкт-Пецярбургу, Варшаве і шэрагу гарадоў Украіны і Беларусі, у тым ліку Кіеве і Мінску.
