Джунглі і касмадром у віцебскіх дварах
Дзівосныя драўляныя скульптуры размясціліся ў дварах дамоў №26 і №28 па вуліцы Церашковай у Віцебску. Тут ёсць джунглі, населеныя жырафам, зебрай, сланом і двума кракадзіламі, і касмадром пад аходвай двух робатаў — добрага і злога.
Цяжка сказаць, у якім стылі выкананыя фігуры, якія досыць умоўна перадаюць жывёл, але, паколькі для іх вырабу выкарыстоўвалася ў асноўным гарадское смецце — чурбакі спілаваных дрэў, катушка для кабелю, таз і розныя спрунжынкі — то, напэўна, гэта можна назваць віцебскім драўляным scrap art-ам.
“Народныя навіны Віцебска” аб’яўляюць паляванне за неардынарным дэкорам двароў нашага горада. Калі вы ўбачылі нешта заслугоўваючае ўвагі, прыўкраснае ці пачварнае, змяшчайце, калі ласка, фотаздымкі і каардынаты ў адмысловую тэму на “Віцебскім форуме”.
