У Віцебску прайшоў Дзень пацалункаў
Сезон флэш-мобаў у Віцебску адкрыўся вечарам 26 траўня “Днём пацалункаў” на плошчы Перамогі.
Нагадаем, што такі флэш-моб ўпершыню адбыўся ў Віцебску прыкладна год назад — тады ў акцыі прынялі ўдзел каля ста чалавек.
Сёлета сустрэча ў Вконтакте сбарала 1084 чалавекі, з іх толькі 419 абяцалі ўдзельнічаць абавязкова. На плошчу Перамогі, як заўсёды, людзей прыйшло значна меней, чым праявіла актыўнасць у сацыяльных сетках. Непасрэдны ўдзел у гульне прымалі каля пяцідзесяці хлопцаў і дзяўчат, яшчэ столькі ж назіралі збоку.
Правілы гульні былі тыя самыя, што і ў мінулым годзе: пара або некалькі пар унутры вялікага карагода, карагод ідзе ў адзін бок, пары круцяцца ў іншы, а калі яны спыняюцца, то хлопец з дзяўчынай, якія апынуліся насупраць адзін аднаго павінны пацалавацца.
У канцы флэш-моба адбыўся конкурс на самы доўгі пацалунак, у якім прынялі ўдзел дванаццаць параў. Восем з іх пратрымаліся больш за гадзіну, тады як мінулагодні рэкорд — сорак пяць хвілінаў. У фінал выйшлі дзве пары, яны цалаваліся гадзіну і сорак пяць хвілін, пры гэтым трыццаць пяць хвілін хлопцы трымалі дзяўчат на руках. І на гэты раз карэспандэнт “Народных навінаў Віцебска” не змог дачакацца канца самага доўгага пацалунка і быў вымушаны з’ехаць.
