Водна-спартыўнае шоў на Дзвіне
24 чэрвеня, другі дзень святкаванняў у Віцебску з нагоды Дня горада, завяршыўся водна-спартыўным шоў на Дзвіне каля плошчы Перамогі.
Спачатку да “Трох штыкоў” водным шляхам прыбыла княгіня Вольга. Яна павітала віцьбічаў і дала старт святу. Затым дружына княгіні пачала сячыся на мячах паміж сабой, інсцэніруючы бітвы, якія адбываліся ў старажытнасці пад горадам.
Пасля перад гледачамі і кіраўніцтвам горада ўрачыстым маршам прайшлі дзеці ў касцюмах гусараў і кадэты. Гэта павінна было сімвалізаваць вайсковую пераемнасць пакаленняў.
Наступнымі рэй узялі выратавальнікі. Яны спускаліся ў лодкі з маста Блахіна па вяроўках, нешта ўзрывалі і падпальвалі (у тым ліку адзін аднаго), а потым тушылі. Пажарны самалёт выкідваў парашутыстаў, якія скокалі то ў ваду, то ў дым. Супрацоўнікі МНС нават утапілі ў Дзвіне, а потым выратавалі старэнькія “Жыгулі”, карацей, забаўлялі публіку, як маглі.
