Народныя навіны ВіцебскаНародные новости Витебска

Экалагічная акцыя пройдзе сёння на двух азёрах – Белае і Млічына – у Глыбоцкім раёне. Сюды заселяць новых “жыльцоў” – 300 шыракапалых ракаў, якія занесены ў Чырвоную кнігу Беларусі.

Белае і Млічына – азёры бясцёкавыя, таму спецыялісты мяркуюць, што новая папуляцыя будзе абаронена ад эпідэмій ракавай чумы і ад замяшчэння іншым відам – даўгапалым ракам.

Акцыя “Захаваем шыракапалага рака ў Беларусі” праходзіць па праекце ПРААН/ГЭФ “Інтэграцыя пытанняў захавання біяразнастайнасці ў палітыку і практыку тэрытарыяльнага планавання ў Беларусі” (“Біяразнастайнасць”). Спецыялісты вывучылі флору і фаўну 36 азёр нашай краіны і прышлі да высновы, што на тэрыторыі Глыбоччыны захавалася толькі адна папуляцыя шыракапалага рака.

Шыракапалы рак адрозніваецца ад сваіх братоў шырокімі, магутна развітымі клюшнямі з зярністымі бугаркамі.

Дадзены від знаходзіцца пад аховай у Беларусі ўжо больш за 30 гадоў. Яго прамысловая і аматарская лоўля забаронены. Аднак асноўнымі прычынамі знікнення віда з’яўляюцца ракавая чума, а таксама зніжэнне ўзроўню паверхневых і грунтавых вод, пагаршэнне якасці вады і іншыя экалагічныя прычыны.