У Доме культуры пасёлка Акцябрскі сёння адбыўся раённы агляд-конкурс народных абрадаў “Зімовыя святкі”.
У творчым спаборніцтве ўдзельнічалі пяць калектываў: Віцебскі раённы цэнтр рамёстваў “Адраджэнне”, Варонаўскі, Акцябрскі, Сушчоўскі, Капцянскі сельскія Дамы культуры. Усе яны прадставілі сваю варыяцыю, як калядавалі нашы продкі.
Званне лаўрэата конкурсу журы ў выніку прысудзіла капцянцам. Астатнія ўдзельнікі атрымалі ганаровыя дыпломы.
Аднак у гледачоў былі свае сімпатыі. Так, карэспандэнты “ННВ” найбольш упадабалі самадзейных артыстаў з Сушчова. У іх была вельмі каларытная і харызматычная вядучая, якая пазнаёміла ўсіх са старажытнымі каляднымі забавамі. Улетку нашым продкам было не да гульняў, таму адпычываць ды гулі гуляць яны маглі толькі на зімовыя святкі. Практычна ўсе калядныя гульні мелі эратычны характар – бо ў гэты час хлопцы і дзяўчаты прыглядалі сабе пару, каб увосень ажаніцца. “Падчас гульняў на Каляды моладзь вельмі шмат цалавалася, гэта быў сапраўдны час пацалункаў”, – з усмешкай раз-пораз нагадвала вядучая, пакуль кавалеры і іхнія паненкі шукалі на сцэне сабе пару.
Досыць яркі нумар паказалі супрацоўнікі Віцебскага раённага цэнтра рамёстваў “Адраджэнне”. Яны калядавалі не толькі з традыцыйнымі казой і мядзведзем, але і з буслікам. Аказваецца, гэту птушку, якая нібыта прадказвае лёс, водзяць на Каляды жыхары Гомельшчыны.
Агляд-конкурс праходзіў у межах раённай праграмы па папулярызацыі і вывучэнні народных традацый “Адвечнае”.
