Да чэмпіяната свету па хакею ў Беларусі збіраюцца адчыніць больш кавярняў і рэстаранаў з нацыянальнай кухняй
У Беларусі неабходна развіваць сетку аб'ектаў грамадскага харчавання з нацыянальнай кухняй. Такое меркаванне выказала на пасяджэнні выязной калегіі ў Віцебску начальнік упраўлення спажывецкага рынку нехарчовых тавараў Міністэрства гандлю Ніна Пашко.
Паводле слоў Ніны Пашко, грамадскае харчаванне, на якое прыпадае больш за 28% гандлёвай інфраструктуры рэспублікі, з'яўляецца важным складнікам спажывецкага рынку. У Беларусі функцыянуюць больш за 12,2 тыс. аб'ектаў грамадскага харчавання. За кошт новага будаўніцтва, рэканструкцыі, а таксама перапрафілявання ў першым квартале адкрыта 65 аб'ектаў грамадскага харчавання.
"Гэта праца дазволіла выканаць сацыяльны стандарт па забеспячэнні насельніцтва месцамі ў агульнадаступнай сетцы, які цяпер складае 35,4 месцы на 1 тыс. жыхароў", - сказала начальнік упраўлення.
Разам з тым неабходна развіваць сетку аб'ектаў грамадскага харчавання з беларускай нацыянальнай кухняй. "На сёння работа вядзецца дрэнна! Што значыць для рэспублікі 164 аб'екты? Асабліва напярэдадні чэмпіянату свету па хакеі ў 2014 годзе. Мы ў першую чаргу павінны паказаць гасцям рэспублікі нашы традыцыі, у тым ліку ў нацыянальнай кухні", - падкрэсліла Ніна Пашко, заклікаўшы надаць развіццю дадзенага кірунку ў грамадскім харчаванні самую пільную ўвагу.
Яшчэ адно важнае пытанне тычыцца работы аб'ектаў прыдарожнага сэрвісу, на якія прыходзіцца 3,7% рознічнага тавараабароту грамадскага харчавання рэспублікі, у Мінскай вобласці - больш за 12,7%. Тэмпы росту рознічнага тавараабароту грамадскага харчавання ў дадзеным сектары вышэй, чым у цэлым па краіне. "Нягледзячы на дынамічнае развіццё сеткі аб'ектаў прыдарожнага сэрвісу, у іх яшчэ застаецца на недастаткова высокім узроўні культура абслугоўвання, вельмі мала аказваецца дадатковых паслуг", - канстатавала начальнік упраўлення.
