У Віцебску асвяцілі касцёл Святога Духа. Фотарэпартаж
18 траўня ў Віцебску мітрапаліт Мінска-Магілёўскі арцыбіскуп Тадэвуш Кандрусевіч асвяціў касцёл Святога Духа, які месціцца на вуліцы Чкалава (дом №5а).
Касцёл Святога Духа — трэці каталіцкі храм, асвечаны ў Віцебску пасля знікнення савецкай улады. 10 кастрычніка быў асвечаны касцёл Езуса Міласэрднага, які пазней стаў катэдральным. Да гэтага ў нашым горадзе быў адзін дзейсны касцёл — Святой Барбары, адноўлены ў 1992 годзе.
Новы касцёл размясціўся ў рэканструяваным будынку недабудаванага басейна, які перадалі вернікам у 2000 годзе. Тады ж была ўтвораная парафія Святога Духа, а набажэнствы пачаліся ў 2001 годзе ў бляшаным бараку. З 2002 года будоўляй храма займаўся ордэн сальватэрыянаў.
У сваёй урачыстай прамове мітрапаліт Тадэвуш Кандрусевіч пажадаў, каб Віцебск стаў слаўным не толькі сваімі фестывалямі кшталту “Славянскага базара” ці “Факела”, але і жыхарамі, вернымі Богу.
