Імя Рыгора Барадуліна ва Ушачах будуць насіць вуліца і школа
У гарадскім пасёлку Ушачы для ушанавання памяці Рыгора Барадуліна яго імем павінны навзаць вуліцу і школу, паведамляецца на сайце Віцебскага аблвыканкама ў адказ на масавы зварот грамадзян.
Ушацкім райвыканкамам і райсаветам ажыццяўляецца праца па перайменаванні вуліцы Школьная ў вуліцу імя Рыгора Барадуліна. Накіраваны ліст у Тапанімічную камісію пры Савеце Міністраў Рэспублікі Беларусь аб магчымасці ўжывання транслітарацыі пры перакладзе плануемай назвы на рускую мову.
Таксама ва Ушацкай сярэдняй школе быў праведзены сход працоўнага калектыву, які прыняў рашэнне пра прысваенне гэтай установе адукацыі імя народнага паэта.
Акрамя гэтага ва Ушацкім музеі народнай славы імя Героя Савецкага Саюза У.Е.Лабанка плануецца пашырыць прысвечаную Рыгору Барадуліну гісторыка-біяграфічную частку экспазіцыі ў зале, адведзенай знакамітым землякам.
Нагадаем, што нядаўна Віцебская абласная рада грамадскага аб’яднання “Таварыства беларускай мовы імя Францыска Скарыны” таксама звярнулася да прэм’ер-міністра Міхаіла Мясніковіча і кіраўніка адміністрацыі прэзідэнта Андрэя Кабякова з прапановай ушанаваць памяць Генадзя Бураўкіна.
