Народныя навіны ВіцебскаНародные новости Витебска

16 лістапада пры дапамозе верталёта Мі-8МТВ-1 Міністэрства надзвычайных сітуацый на могілкі ля Ушачаў быў дастаўлены 2,5-тонны валун з крыжом, які ўсталююць на магіле народнага паэта Беларусі Рыгора Барадуліна.

Аўтарам помніка з’яўляецца скульптар Ігар Засімовіч, а валун для яго быў знойдзены пад вёскай Кублічы Ушачскага раёна — у гэтай вёсцы заканчваў школу Васіль Быкаў. На камяні выбіты шасціканцовы крыж, гады жыцця і надпіс «Рыгор Барадулін. Сын.»

Выкарыстоўваць верталёт прыйшлося з-за таго, што магіла паэта знаходзіцца пасярод могілак, якія размешчаныя на досыць высокім пагорку, парослым высокімі соснамі. Яна акружаная іншымі пахаваннямі, так што цяжкі груз можна было перанесці толькі па паветры, а верталёт Мі-8МТВ-1 здатны падымаць на знешняй падвесцы да 4 тонаў.

Выратавальнікі аказвалі і іншую дапамогу ў добраўпарадкаванні месца пахавання паэта, так, з-за складанага рэльефу ўручную было перанесена больш за 800 вёдзер цэменту, што складае прыкладна 9,5 тонаў, паведамляе прэс-служба МНС.

Рыгор Барадулін памёр у Мінску 2 сакавіка 2014 года, а 4 сакавіка быў пахаваны побач з маці Акулінай Андрэеўнай на мясцовых могілках ва Ушачах.