У Віцебску памёр адзін з заснавальнікаў “Узгор’я” Міхась Паўлаў
На шасцідзясятым годзе жыцця памёр грамадскі дзеяч, адзін з заснавальнікаў клуба “Узгор'е” і стваральнікаў Беларускага Народнага Фронта у Віцебску Міхась Паўлаў.
“Узгор'е” у Віцебску паўстала ў 1986 годзе, калі ўзнікла пагроза знішчэння Пакроўскай царквы, якая ў савецкія часы стаяла ў занядбаным стане – храм думалі ўзарваць і ўжо падрыхтаваліся да гэтага. Міхась Паўлаў разам з археолагам Ігарам Цішкіным сталі ініцыятарамі стварэння клуба “Узгор'е”, які займаўся захаваннем гісторыка-культурнай спадчыны Віцебшчыны.
Таксама Міхась Паўлаў актыўна ўдзельнічаў у зборы подпісаў супраць будаўніцтва пад Віцебскам атамнай электрастанцыі. Пазней ствараў у Віцебску структуры БНФ, да канца 1990-х спадар Паўлаў быў старшынём гарадской рады Фронта.
Міхась Паўлаў сур'ёзна цікавіўся краязнаўствам, напісаў і выдаў некалькі брашур пра гісторыю Віцебска і Віцебшчыны, у тым ліку – пра забойства Язафата Кунцэвіча. Постаць уніяцкага архіепіскапа цікавіла спадара Паўлава, бо ён быў адным з заснавальнікаў грэка-каталіцкай парафіі Віцебска.
Апошнія гады Міхась Паўлаў займаўся прадпрымальніцтвам, сярод іншага – і вырабам сувенірнай прадукцыі, у Віцебску можна было набыць керамічныя плакеткі яго вытворчасці з выявамі “Пагоні”, герба Віцебска ці архітэктурных помнікаў.
Развітанне з Міхасём Паўлавым адбудзецца 28 красавіка а 12:30 у рытуальнай зале судмедэкспертызы (вуліца Гагарына, 10а).
