У Віцебску зноў жанілі Цярэшку. Фотарэпартаж
21 студзеня ў Віцебску чарговы раз згулялі ў старажытную абрадаваю гульню “Жаніцьба Цярэшкі” —жартаўлівае вяселле, якое ладзілася моладдзю, каб хлопцы і дзяўчаты маглі лепш перазнаёміцца паміж сабой.
Цярэшку ў Віцебску цяпер жэняць у арт-пабе “Торвальд”, гэты цікавы абрад праводзілі тут і летась. Сёлета на гульню сабралася трохі больш за дваццаць чалавек.
У XXI стагоддзі гэтая старадаўняя забава захавалася захавалася толькі ў некалькіх раёнах Беларусі, найбольш вядомыя гульні ў Цярэшку на тэрыторыі Лепельскага раёна. У Віцебску абрадавую гульню адрадзіла моладзь са студэнцка-этнаграфічнага таварыства “Поўнач”. Дарэчы, сёлета на “Жаніцьбу Цярэшкі” прыйшлі муж з жонкай, якіх “ажанілі” на самай першай гульні ў 2012 годзе.
“Жаніцьба Цярэшкі” ў Віцебску заўсёды прыходзіць з жывым гукам: музычны акампанемент заўсёды забяспечвае дудар Васіль Шкіндзер. Акрамя дуды ён грае яшчэ і на скрыпцы.
